ഇന്ത്യൻ ടെലിവിഷൻ ചരിത്രത്തിലെ ഏറ്റവും കൂടുതൽ സീസണുകൾ പിന്നിട്ട റിയാലിറ്റി ഷോയാണ് ബിഗ് ബോസ് ഹിന്ദി. നിലവിൽ മലയാളം ഉൾപ്പെടെ വിവിധ ഇന്ത്യൻ ഭാഷകളിൽ ഈ ഷോ നടക്കുന്നുണ്ട്.
ഇന്ത്യൻ ടെലിവിഷൻ ചരിത്രത്തിലെ ഏറ്റവും വലിയ റിയാലിറ്റി ഷോകളിലൊന്നായ ബിഗ് ബോസ് ഹിന്ദിക്ക് നിയമക്കുരുക്ക്. പകർപ്പവകാശ ലംഘനത്തിന്‍റെ പേരിൽ ഷോയുടെ അണിയറപ്രവർത്തകർക്ക് വക്കീൽ നോട്ടീസ് ലഭിച്ചതായാണ് റിപ്പോർട്ടുകൾ. അനുവാദമില്ലാതെ പാട്ടുകൾ ഉപയോഗിച്ചതിന് 2 കോടി രൂപ നഷ്ടപരിഹാരം നൽകണമെന്നാണ് ആവശ്യം.
ഷോയുടെ 19-ാം സീസണിലെ പതിനൊന്നാം എപ്പിസോഡിലാണ് ഈ സംഭവം. അഗ്നിപഥിലെ ‘ചിക്‌നി ചമേലി’, ഗോരി തേരി പ്യാർ മേയിലെ ‘ധത് തേരി കി മൈൻ’ എന്നീ ഗാനങ്ങളാണ് അനുവാദമില്ലാതെ ഉപയോഗിച്ചത്. ഇതിനെതിരെയാണ് നോട്ടീസ് അയച്ചിരിക്കുന്നത്. ഓഗസ്റ്റ് 24-നാണ് ബിഗ് ബോസ് ഹിന്ദി സീസൺ 19 ആരംഭിച്ചത്. സൽമാൻ ഖാൻ ആണ് ഈ സീസണിലെയും അവതാരകൻ.
അനുവാദമില്ലാതെ മറ്റൊരാളുടെ സൃഷ്ടികൾ ഉപയോഗിക്കുന്നത് നിയമപരമായി കുറ്റകരമാണ്. ടെലിവിഷൻ, സിനിമ, സംഗീതം, സാഹിത്യം തുടങ്ങി പല മേഖലകളിലും ഇത്തരം പകർപ്പവകാശ ലംഘനങ്ങൾ നടക്കാറുണ്ട്. ഇതിനെതിരെ ശക്തമായ നിയമ നടപടികൾ സാധാരണമാണ്. അതുകൊണ്ട് തന്നെ ബിഗ് ബോസ് ടീമിന് ഈ വിഷയത്തിൽ എന്ത് സംഭവിച്ചാലും അത് വലിയ വാർത്താ പ്രാധാന്യം നേടും.
About the Author
