സംസ്ഥാനത്തെ ജയിൽ സുരക്ഷാ സംവിധാനങ്ങൾ വിലയിരുത്തുന്നതിനായി മുഖ്യമന്ത്രി വിളിച്ച അടിയന്തര യോഗം ഇന്ന് രാവിലെ 11 മണിക്ക് ഓൺലൈനായി ചേരും. ജയിൽ മേധാവി, ജയിൽ ഡിഐജിമാർ, സൂപ്രണ്ടുമാർ എന്നിവർക്കൊപ്പം ക്രമസമാധാന ചുമതലയുള്ള ഡിജിപിയും ആഭ്യന്തര സെക്രട്ടറിയും യോഗത്തിൽ പങ്കെടുക്കും. ജയിൽ സുരക്ഷാ വീഴ്ചകൾ, ജീവനക്കാരുടെ കുറവ്, തടവുകാരും ഉദ്യോഗസ്ഥരുമായി ബന്ധപ്പെട്ട് ഇന്റലിജൻസ് വിഭാഗം നൽകിയ വിവരങ്ങൾ എന്നിവയെല്ലാം യോഗത്തിൽ വിശദമായി ചർച്ച ചെയ്യും. കണ്ണൂർ സെൻട്രൽ ജയിലിൽ നിന്ന് കൊടുംകുറ്റവാളി ഗോവിന്ദച്ചാമി ജയിൽ ചാടിയ പശ്ചാത്തലത്തിലാണ് നേരത്തെ തിങ്കളാഴ്ചത്തേക്ക് നിശ്ചയിച്ചിരുന്ന യോഗം ഇന്ന് ചേരാൻ തീരുമാനിച്ചത്.
ഗോവിന്ദച്ചാമിയുടെ ജയിൽ ചാട്ടം: ഗുരുതര വീഴ്ചകൾ ഒന്നൊന്നായി പുറത്ത്
ഗോവിന്ദച്ചാമിയുടെ ജയിൽ ചാട്ടം ജയിൽ അധികൃതരുടെ ഭാഗത്തുനിന്നുണ്ടായ ഗുരുതരമായ വീഴ്ചകളാണ് വ്യക്തമാക്കുന്നത്. വെള്ളിയാഴ്ച രാവിലെ നടത്തിയ പരിശോധനയിൽ എല്ലാ തടവുകാരും അഴിക്കുള്ളിൽ ഉണ്ടെന്നായിരുന്നു ഗാർഡ് ഓഫീസർക്ക് ലഭിച്ച റിപ്പോർട്ട്. എന്നാൽ, ജയിലിന്റെ മതിൽക്കെട്ടിൽ കെട്ടിയിട്ട തുണികൊണ്ടുള്ള കയർ കണ്ടശേഷമാണ് ഒരാൾ ചാടിയെന്ന വിവരം അധികൃതർ അറിയുന്നത്. വീണ്ടും നടത്തിയ പരിശോധനയിലാണ് ചാടിയത് ഗോവിന്ദച്ചാമിയാണെന്ന് സ്ഥിരീകരിച്ചത്. ഇത് പ്രാഥമിക റിപ്പോർട്ട് പോലും കൃത്യമായിരുന്നില്ല എന്ന് വ്യക്തമാക്കുന്നു.
മാത്രമല്ല, ഗോവിന്ദച്ചാമിയുടെ ജയിൽവാസത്തിലും ഗുരുതര വീഴ്ചകളുണ്ടായെന്ന് ഇപ്പോൾ പുറത്തുവരുന്ന വിവരങ്ങൾ സൂചിപ്പിക്കുന്നു. മാസത്തിൽ ഒരിക്കൽ മുടിവെട്ടുകയും ആഴ്ചയിൽ ഷേവ് ചെയ്യുകയും വേണമെന്നാണ് ചട്ടം. എന്നാൽ, ഗോവിന്ദച്ചാമിയെപ്പോലൊരു കൊടുംകുറ്റവാളി താടി നീട്ടി വളർത്തിയിട്ടും ജയിൽ ഉദ്യോഗസ്ഥർ അത് കണ്ടില്ലെന്ന് നടിച്ചത് എന്തിനെന്ന ചോദ്യത്തിന് അധികൃതർ ഉത്തരം നൽകേണ്ടി വരും. ആരാണ് ഇതിന് അനുമതി നൽകിയത് എന്നതും ദുരൂഹമാണ്.
ഒന്നര മാസത്തെ ആസൂത്രണം, ഗുരുവായൂരിൽ കവർച്ച ലക്ഷ്യം: ഗോവിന്ദച്ചാമിയുടെ വെളിപ്പെടുത്തലുകൾ
പിടിയിലായതിന് ശേഷം പോലീസിന് നൽകിയ മൊഴിയിൽ ഞെട്ടിക്കുന്ന വിവരങ്ങളാണ് ഗോവിന്ദച്ചാമി വെളിപ്പെടുത്തിയത്. ഒന്നര മാസത്തെ ആസൂത്രണത്തിനൊടുവിലാണ് ജയിൽ ചാടിയതെന്നും, അഴികൾ മുറിക്കാൻ ഒന്നര മാസമെടുത്തെന്നും ഇയാൾ പറഞ്ഞു. മുറിച്ച ഭാഗങ്ങൾ പുറത്തുനിന്ന് കാണാതിരിക്കാൻ തുണികൊണ്ട് മൂടിവെച്ചിരുന്നു. അഴികൾ മുറിക്കാനുള്ള ബ്ലേഡ് ജയിലിലുള്ള ഒരാളാണ് നൽകിയതെന്നും ഗോവിന്ദച്ചാമി മൊഴി നൽകി. എന്നാൽ, ആ വ്യക്തിയുടെ വിവരങ്ങൾ ഇയാൾ വെളിപ്പെടുത്തിയിട്ടില്ല. ആയുധം നൽകിയ ആളെ കണ്ടെത്താൻ പോലീസ് അന്വേഷണം ആരംഭിച്ചിട്ടുണ്ട്.
ജയിലിന്റെ മതിൽ ചാടുന്നതിനായി പാൽപ്പാത്രങ്ങളും ഡ്രമ്മുകളും ഉപയോഗിച്ചതായും ഇയാൾ വെളിപ്പെടുത്തി. ജയിൽ ചാടിയ ശേഷം ഗുരുവായൂരിൽ എത്തി മോഷണം നടത്താനായിരുന്നു പദ്ധതി. കവർച്ച ചെയ്യുന്ന പണവുമായി മറ്റ് സംസ്ഥാനങ്ങളിലേക്ക് രക്ഷപ്പെടാനായിരുന്നു ലക്ഷ്യം. റെയിൽവേ സ്റ്റേഷൻ എവിടെയാണെന്ന് വ്യക്തമല്ലാത്തതുകൊണ്ടാണ് താൻ ഡിസിസി ഓഫീസ് പരിസരത്ത് എത്തിയതെന്നും അവിടെവെച്ചാണ് പിടിയിലായതെന്നും ഗോവിന്ദച്ചാമി പോലീസിനോട് പറഞ്ഞു.
ജയിലിനുള്ളിൽ വെച്ച് പുറത്തുള്ള ചിലരുമായി നിരന്തരം ബന്ധപ്പെട്ടിരുന്നതായും ഇയാൾ വെളിപ്പെടുത്തി. ഈ വിവരങ്ങളുടെ അടിസ്ഥാനത്തിൽ ഗോവിന്ദച്ചാമിയെ ജയിൽ ചാടാൻ സഹായിച്ചവരെക്കുറിച്ചും കൂടുതൽ പേർക്ക് സംഭവത്തിൽ പങ്കുണ്ടോ എന്നതിനെക്കുറിച്ചും പോലീസ് വിശദമായ അന്വേഷണം ആരംഭിച്ചിട്ടുണ്ട്. ജയിൽ അധികൃതരുടെ ഭാഗത്തുനിന്നുണ്ടായ സുരക്ഷാ വീഴ്ചയും പോലീസ് ഗൗരവമായി പരിശോധിച്ചുവരികയാണ്.
About the Author
