പുതിയ താരങ്ങളുടെ വരവ് ലീഗിന് പുത്തൻ ആവേശം പകരുമെന്ന് ഉറപ്പാണ്. പുതിയ ടീം കോമ്പിനേഷനുകൾ പുതിയ തന്ത്രങ്ങൾക്ക് വഴിയൊരുക്കും. ഇവരില്‍ ആരൊക്കെയാകും തങ്ങളുടെ മികച്ച പ്രകടനങ്ങളുമായി കളം നിറയുകയെന്ന ആകാംഷയിലാണ് കേരളത്തിലെ ക്രിക്കറ്റ് ആരാധകർ.
തിരുവനന്തപുരം: കേരള ക്രിക്കറ്റ് ലീഗിന്റെ (കെസിഎൽ) രണ്ടാം സീസണിന് ആവേശം പകർന്ന് മുപ്പതിലേറെ പുതിയ താരങ്ങൾ കളിക്കളത്തിലിറങ്ങുന്നു. യുവപ്രതിഭകൾക്ക് കഴിവ് തെളിയിക്കാനുള്ള വലിയ വേദിയായി കെസിഎൽ മാറുന്നുവെന്നതിന്റെ തെളിവാണിത്. കഴിഞ്ഞ സീസണിൽ കെസിഎല്ലിലൂടെ മികവ് കാണിച്ച് ഐപിഎല്ലിൽ വരെ എത്തിയ വിഘ്‌നേഷ് പുത്തൂരിനെപ്പോലുള്ള താരങ്ങൾ ഇതിന് ഉദാഹരണമാണ്.
കെസിഎ ടൂർണമെന്റുകൾ, ക്ലബ്ബ് ക്രിക്കറ്റ്, ഏജ് ഗ്രൂപ്പ് ടൂർണമെന്റുകൾ എന്നിവിടങ്ങളിൽ മികച്ച പ്രകടനം കാഴ്ചവെച്ചവരാണ് ഇത്തവണ കെസിഎല്ലിലെത്തുന്ന പുതുമുഖങ്ങളിൽ ഏറെയും. ഗ്രാസ് റൂട്ട് തലത്തിൽ ഒട്ടേറെ കഴിവുള്ള താരങ്ങൾ വളർന്നുവരുന്നുണ്ടെന്ന് ഇത് വ്യക്തമാക്കുന്നു.
ടീം തിരിച്ചുള്ള പുതുമുഖങ്ങൾ:
കഴിഞ്ഞ തവണത്തെ ചാമ്പ്യന്മാരായ ഏരീസ് കൊല്ലം സെയിലേഴ്‌സിലാണ് പുതിയ താരങ്ങൾ താരതമ്യേന കുറവുള്ളത്. അതേസമയം, ഏറ്റവും കൂടുതൽ പുതിയ താരങ്ങളുള്ളത് ആലപ്പി റിപ്പിൾസിലാണ്. കേരള രഞ്ജി ടീം അംഗം കൂടിയായ ജലജ് സക്സേനയും ആദിത്യ ബൈജുവുമാണ് ആലപ്പി ടീമിലെത്തിയ പ്രമുഖ പുതുമുഖങ്ങൾ. 12.40 ലക്ഷം രൂപയ്ക്കാണ് ആലപ്പി ജലജ് സക്സേനയെ സ്വന്തമാക്കിയത്. ഇന്ത്യൻ ക്രിക്കറ്റിലെ ഏറ്റവും പരിചയസമ്പന്നനായ താരമെന്ന് വിശേഷിപ്പിക്കാമെങ്കിലും കെസിഎല്ലിൽ ഇത് അദ്ദേഹത്തിന്റെ ആദ്യ സീസണാണ്. ജലജിന്റെ അനുഭവസമ്പത്ത് ടീമിന് മുതൽക്കൂട്ടാകുമെന്ന പ്രതീക്ഷയിലാണ് ടീം മാനേജ്‌മെന്റ്.
ജലജിന് പുറമെ, ശ്രീരൂപ് എംപി, ബാലു ബാബു, ആകാശ് പിള്ള, മുഹമ്മദ് നാസിൽ, അർജുൻ നമ്പ്യാർ എന്നിവരാണ് ആലപ്പി നിരയിലെ പുതിയ താരങ്ങൾ.
ജലജിനെപ്പോലെ തന്നെയാണ് കൊച്ചിൻ ബ്ലൂ സ്പൈക്കേഴ്സിന് സഞ്ജു സാംസണും. കഴിഞ്ഞ തവണ കളിക്കാതിരുന്ന സഞ്ജുവിനും ഇത് ആദ്യ സീസണാണ്. ഇതിന് പുറമെ വെറ്ററൻ താരം കെ ജെ രാകേഷ്, അഖിൽ കെ ജി, മുഹമ്മദ് ആഷിക് എന്നിവർ ആദ്യമായി കെസിഎൽ കളിക്കാനൊരുങ്ങുന്നവരാണ്.
പുതിയ താരങ്ങൾ താരതമ്യേന കൂടുതലുള്ള മറ്റൊരു ടീമാണ് കാലിക്കറ്റ് ഗ്ലോബ് സ്റ്റാർസ്. പ്രീതിഷ് പവൻ, കൃഷ്ണദേവൻ, ടി വി കൃഷ്ണകുമാർ തുടങ്ങിയവരാണ് കാലിക്കറ്റിനൊപ്പമുള്ള പുതിയ താരങ്ങൾ.
ടൂർണമെന്റിലെ ഏറ്റവും പ്രായം കുറഞ്ഞ താരമായ കെ ആർ രോഹിത്, വിഷ്ണു മേനോൻ, സിബിൻ ഗിരീഷ്, അജു പൗലോസ്, ആതിഫ് ബിൻ അഷ്‌റഫ് എന്നിവരാണ് തൃശൂർ സ്റ്റാർസിന്റെ പുതുതാരങ്ങൾ.
സഞ്ജീവ് സതീശൻ, ആസിഫ് സലിം, അനു രാജ് ടി എസ്, അദ്വൈത് പ്രിൻസ്, ജെ അനന്തകൃഷ്ണൻ എന്നീ പുതിയ താരങ്ങളെ ട്രിവാൺഡ്രം റോയൽസും സ്വന്തമാക്കിയിട്ടുണ്ട്.
About the Author
