അതിശയകരമായ പാചക വീഡിയോകളിലൂടെ സോഷ്യൽ മീഡിയയിൽ ശ്രദ്ധേയനായ യൂട്യൂബർ ഫിറോസ് ചുട്ടിപ്പാറ തന്റെ യൂട്യൂബ് ചാനൽ നിർത്തുന്നതായി പ്രഖ്യാപിച്ചു. “ഞാൻ യൂട്യൂബ് ചാനൽ നിർത്തുന്നു” എന്ന തലക്കെട്ടോടെ പങ്കുവെച്ച വീഡിയോയിലൂടെയാണ് ഒമ്പത് മില്യണിലധികം സബ്സ്ക്രൈബർമാരുള്ള ഫിറോസ് ഈ വിവരം ആരാധകരെ അറിയിച്ചത്.
ഫിറോസ് ചുട്ടിപ്പാറയെ പ്രശസ്തനാക്കിയത് 100 കിലോ മീൻ അച്ചാർ, 35 കിലോ പാമ്പ് ഗ്രിൽ, വറുത്തരച്ച മയിൽ കറി, ഒട്ടകപ്പക്ഷി ഗ്രിൽ തുടങ്ങിയ വേറിട്ട പാചക പരീക്ഷണങ്ങളാണ്. നാട്ടിൽ മാത്രമല്ല വിദേശ രാജ്യങ്ങളിലും അദ്ദേഹം വീഡിയോകൾ ചെയ്തിട്ടുണ്ട്.
യൂട്യൂബ് വരുമാനം മാത്രം ആശ്രയിച്ച് മുന്നോട്ട് പോകാൻ കഴിയില്ലെന്നും, ഒരു പുതിയ ബിസിനസ് സംരംഭത്തിലേക്ക് കടക്കുകയാണെന്നും യൂട്യൂബ് ലൈവിലൂടെ ഫിറോസ് വ്യക്തമാക്കി. യുഎഇ ആസ്ഥാനമായിട്ടായിരിക്കും തന്റെ പുതിയ ബിസിനസ്സെന്നും അദ്ദേഹം അറിയിച്ചു.
എങ്കിലും, യൂട്യൂബ് പൂർണ്ണമായി ഉപേക്ഷിക്കുന്നില്ലെന്നും റീലുകളും സമയം കിട്ടുന്നതിനനുസരിച്ച് ചെറിയ വീഡിയോകളും തുടർന്നും പോസ്റ്റ് ചെയ്യുമെന്നും ഫിറോസ് പറഞ്ഞു. ബിസിനസ് രംഗത്ത് കൂടുതൽ ശ്രദ്ധ ആവശ്യമായതുകൊണ്ട് വലിയ പാചക വീഡിയോകൾക്ക് പകരം റീലുകളിലായിരിക്കും ഇനി കൂടുതൽ ശ്രദ്ധ കേന്ദ്രീകരിക്കുക. കുക്കിംഗ് വീഡിയോകൾ പൂർണ്ണമായി ഉപേക്ഷിക്കുന്നില്ലെന്നും ഇടയ്ക്ക് ചെറിയ വീഡിയോകളുമായി എത്തുമെന്നും അദ്ദേഹം കൂട്ടിച്ചേർത്തു.
About the Author
